काभ्रे – नेपाल प्रिमियर लिग (एनपीएल) को हिजो सम्पन्न खेलमा सुदूरपश्चिमका अलराउण्डर तथा एमबीबीएस डाक्टर इशान पाण्डेले उत्कृष्ट प्रदर्शन गर्दै टोलीलाई शानदार जित दिलाएका छन्। जनकपुर बोल्ट विरुद्धको खेलमा उनले ३५ बलमा ५६ रन प्रहार गर्दै ‘प्लेयर अफ द म्याच’को अवार्ड हात पारेका हुन्। उत्कृष्ट प्रदर्शनका लागि पाण्डेले ५० हजार रुपैयाँ नगद पुरस्कार प्राप्त गरे।
पाण्डे क्रिकेटर मात्र होइनन्, पेशाले एमबीबीएस डाक्टरसमेत हुन्। हाल धुलिखेल अस्पतालमा कार्यरत उनी खेलबाट फुर्सद मिल्नेबित्तिकै पुनः बिरामीको सेवामा खटिने गर्छन्। अस्पतालमा उपचार सेवा र मैदानमा प्रदर्शन—दुवै क्षेत्रमा सक्रिय रहेर उनले दुबै भूमिकामा उत्कृष्टता देखाउँदै आएका छन्।
क्रीडा र सेवाको अद्वितीय संयोजन प्रस्तुत गर्दै डाक्टर पाण्डेले युवालाई पनि आफ्नो रुचि र पेशा दुवै क्षेत्रमा समान रूपमा अघि बढ्न सकिने सन्देश दिएका छन्।
