लामो समयदेखि जापानमा बस्दै आउनुभएका नेपालका गायक बज्र गुरुङले गाउनु भएको जापानी गीत ‘आइताकु नारु’को सार्वजनिक भएको छ । दिपेश सिंहको सङ्गीत संयोजन रहेको गीतको भिडियो होटल र्याडिसनमा एक कार्यक्रमबीच सार्वजनिक गरिएको हो ।
भिडियो वरिष्ठ सङ्गीतज्ञ एवम् नाट्य कला प्रज्ञा प्रतिष्ठानका पूर्व उपकुलपति शम्भुजित बास्कोटाको प्रमुख आतिथ्यता तथा वरिष्ठ गायिका ज्ञानु राणा, जापानी नागरिक एवम् व्यबसायी यौची टाडा र मेग्मिको विशेष अतिथीमा सार्वजनिक गरिएको थियो ।
वर्ल्डवाइड मिडिया नेटवर्कद्वारा आयोजना गरिएको कार्यक्रममा वरिष्ठ गायिका ज्ञानु राणालाई गीत सङ्गीतको क्षेत्रमा दिएको योगदानको कदर स्वरुप नगदसहित सम्मान गरिएको थियो ।
कार्यक्रममा बोल्दै गायक गुरुङले आफ्नो कर्मथलो जापान भए पनि जन्मभुमि नेपाललाई सदा सम्झिरहेको बताउनुभयो । गीत, सङ्गीत, कलाकै माध्यमबाट नेपाल तथा जापान बिचको दौत्य सम्बन्ध अझ प्रगाढ हुने विषयमा गायक बिश्वस्त हुनुहुन्छ । ईतिहासमै कुनै विदेशीले जापानीज भाषामा गीत रचना गरी सङ्गीतबद्ध गरेर गाएको सम्भवत यो पहिलो रहेको कुरा गायक गुरुङले बताउनुभएको थियो ।
वरिष्ठ सङ्गीतज्ञ बास्कोटाले संसारका धेरै देश पुगिसकेको तर जापान पुग्न बाँकी रहेको बताउँदै त्यहाँको सङ्गीतमा अलग्गै मिठास रहेको विचार राख्नुभयो ।
सम्मानित व्यक्तित्व गायिका राणाले आफूलाई यस्तो महत्वपूर्ण कार्यक्रममा सम्मान गरेकोमा आयोजक तथा गायकप्रति धन्यवाद व्यक्त गर्नुभयो ।
वल्र्डवाईड मिडिया नेटवर्कका प्रमुख एवम् गायक रामकृष्ण श्रेष्ठले स्वागत मन्तव्य राख्नुभएको थियो भने कार्यक्रमको समापन उक्त गीतको रेकर्डष्टि तथा सङ्गीतकार सुरेन्द्र श्रेष्ठले गर्नुभएको थियो । कार्यक्रमको सञ्चालन सञ्चारकर्मी विना श्रेष्ठले गर्नुभएको थियो ।
गायक गुरुङकै रचना र सङ्गीत रहेको यस जापानी गीतको छायाँकन भने नेपालकै रमणीय स्थलहरूमा गरिएको छ । गीतको भिडियोमा नायिका नम्रता सापकोटाको साथमा मोडल विकेश तण्डुकार तथा गायक गुरुङको अभिनय छ ।
भिडियोमा माधव वेल्वासेको सम्पादन, निशिला शाक्यको कोरियोग्राफी र अमृत सुनवारको छायाँकन तथा निर्देशन छ ।
