बनेपा – अरनिको राजमार्गअन्तर्गत बनेपाको तीनदोबाटोदेखि पुलबजारसम्मको सडक विस्तारमा देखिएको विवाद काभ्रे उद्योग वाणिज्य संघको निरन्तर पहलपछि समाधान भएको छ। स्थानीयसँग परामर्श बिना तयार गरिएको डिपिआरका कारण रोकिएको सडक निर्माण अब सुधारिएको मोडल अनुसार अघि बढ्ने भएको हो।
संघका अध्यक्ष प्रताप वैद्यका अनुसार आयोजनाले सडकको केन्द्र भाग कायम गर्ने, सर्भिस लेनको संरचना परिवर्तन गर्ने लगायत सुझावलाई आत्मसात् गर्दै नयाँ डिपिआर तयार पारेको छ। प्रारम्भिक योजनामा प्रस्ताव गरिएको ३.५ मिटर अग्लो पुल संशोधन हुँदै २.६८ मिटरमा सीमित गरिने जानकारी बनेपा नगरपालिकामा भएको छलफलमा साझा गरिएको छ।
नयाँ सहमतिअनुसार सडकको दुवैतर्फ ६÷६ मिटर सर्भिस लेन निर्माण हुनेछ भने बाहिरी भागमा फुटपाथ रहनेछ। खानेपानी, बिजुली र ढल व्यवस्थापनका लागि अर्डरपाससहितको मोडल पनि सार्वजनिक गरिएको छ।
आगामी वर्षाको डुबान जोखिम न्यूनीकरणका लागि करिडोर नक्सा, माटो खोल्ने काम लगायतका सुझाव संघले दिएको छ। आइतबार बसेको बैठकमा बनेपा नगरपालिकाका मेयर शान्तिरत्न शाक्यले विवाद औपचारिक रूपमा समाधान भएको घोषणा गर्दै सडकको साइज नघटाई निर्माण अघि बढाइने बताए।
कार्यक्रममा सूर्यविनायक–धुलिखेल सडक आयोजनाका प्रमुख, नगरप्रमुख, उपप्रमुख, वडाध्यक्षहरू, स्थानीयवासी तथा काभ्रे उद्योग वाणिज्य संघका पदाधिकारीहरूको उपस्थिति थियो। स्थानीयले अरनिको राजमार्गभरि एकरूप मोडलमा काम गर्नुपर्ने माग पनि दोहोर्याएका छन्।
