पनौती/ काभ्रे
पनौतीको नगर बाल समुह संजालको अध्यक्षमा पनौती नगरपालिका वडा न ६ का एन्जिला खत्री सर्वसम्मत रुपमा चयन भएकि छिन् ।
पनौती नगरपालिकाको स्वाभिमान,दिगो बालमैत्रीयुक्त पनौती हाम्रो अभियान भन्ने नाराका साथ पनौती नगरपालिकाले नगर बाल समुह संजालको प्रकृयागत पुनर्गठन गरेको छ । शनिबार एक कार्यक्रमको आयोजना गरि पनौती नगरपालिकाको बालमैत्री शाखाले नगर बाल समुह संजालको पुनर्गठन गरेको हो । प्रत्येक वडाबाट एक जना बालक र एक जना बालिका जम्मा गरी संजाल तयार पारेको हो ।
नगर बाल समुह संजालको उपाध्यक्षमा वडा न ५ बाट जेशन थापा, सचीवमा वडा न ८ बाट श्रेया मगराती, कोषाध्यक्षमा वडा न ५ का सम्भवी श्रेष्ठ र सह सचीवमा निशान थापा वडा न ११ बाट चयन भएका छन् ।
कार्यक्रमलाई सम्बोधन गर्दै पनौती नगरपालिकाका प्रमुख रामशरण भण्डारीले बाल समुह संजालले असल र चरीत्रवान व्यक्ति निर्माण गर्ने बताउदै असल व्यक्ति बन्न व्यवहारीक हुनुपर्नेमा जोड दिए । उनले बालबालिकालाई अधिकार संगै कर्तव्य परायण बनाउन पनि आवश्यक रहेको बताए । प्रमुख भण्डारीले बालबालिका साझा चौतारी भएकोले बाल समुह संजालमा आबद्ध बालबालिकामा कुनैपनि राजनैतिक पार्टीको गन्ध आउन नहुने बताएका छन् । नगर बाल संजाल बाल संजालनै हो यसलाई कुनैपनि राजनैतिक पार्टी भातृसस्था नबनाइदिनुहुन सबै बालबालिकालाई आग्रह समेत गरे । साथै आगामी दिनमा पनौतीको नगर बाल समुह संजाल सबैभन्दा गुणस्तरयुक्त संजाल बन्नेमा आफुले बिश्वास लिएको बताए ।
त्यस्तै गरि नगर उपप्रमुख गीता बन्जाराले समाज परिवर्तन गर्न नगर बाल समुह संजालको निकै महत्त्वपूर्ण योगदान रहेको बताइन् साथै उनले बाल समुह संजाल मार्फत धेरै प्रतिभाहरु जन्माएको र धेरै सिर्जनसिल कार्यहरू भएको भन्दै प्रसंशा गरिन् ।
कार्यक्रममा नगर बाल संजालका निवर्तमान अध्यक्ष दिक्षित न्यौपानेले आफ्नो कार्यकालमा १८ हजार बालबालिकाको नेतृत्व गरि बालबालिकाको हक, हित र संरक्षण क्षेत्रमा धेरै कार्यहरू भएको जिकिर गरे ।
समुह संजाल गठन गर्न बालमैत्री स्थानीय शासन राष्ट्रिय सहजकर्ता बिष्णु प्रसाद चौवेले सहजीकरण गर्नुभएको थियो । चौवेले बालबालिका ऎन २०७५,स्थानीय सरकार संचालन ऎन २०७४, बालमैत्री स्थानीय शासन कार्यान्वयन निर्देशिका २०७८ र घोषणा कार्यबिधी २०७८ लाई टेकेर पनौती नगर बाल समुह संजालको प्रकृयागत पुनर्गठन गरिएको जानकारी दिए ।
कार्यक्रममा नवनियुक्त अध्यक्ष एन्जिला खत्रीले आफ्नो कार्यसमितिले पनौती नगरपालिकाको बालमैत्री अभियानलाई सफल पार्न सधैंभरी तल्लीन भइ कार्य गर्ने बताइन् ।
पनौती नगरपालिका बि.स. २०७८ सालमै बालमैत्री नगर घोषणा भैसकेको छ भने आगामी दिनमा बालश्रममुक्त नगर घोषणा गर्ने तयारिमा पनि नगरपालिका रहेको छ ।

तपाईको प्रतिक्रिया

५ वर्षमा बनेपा केहिन केही परिवर्तन हुनेछ|| काम गर्न दिनुहोस् ||समृद्ध बनेपा बनाउने अभियानमा छौ …..