काभ्रे । काठमाडौं विश्वविद्यालय (केयू)मा ‘आइटी मिट २०२५’ आयोजना गरिएको छ । काठमाडौं विश्वविद्यालयको कम्प्युटर साइन्स एण्ड इन्जिनियरिङ विभागअन्तर्गत सञ्चालित काठमाडौं विश्वविद्यालय कम्प्युटर क्लब (केयूसिसी) को आयोजनामा कार्यक्रम सञ्चालन हुन लागेको हो ।
आज आयोजित पत्रकार सम्मेलनमार्फत आयोजकले ‘आइटी मिट २०२५’ को तयारी पुरा भएको बताए । साढे दुई दशकदेखि नेपालमा सूचना प्रविधि शिक्षा र विकासमा अग्रणी भूमिका खेल्दै आएको क्लबले नवप्रवर्तन, सहकार्य र सीप विकासलाई प्रवद्र्धन गर्ने उद्देश्यसहित हरेक वर्ष ‘आइटी मिट’ आयोजना गर्दै आएको क्लबका उपाध्यक्ष किरण दाहालले बताए । उनका अनुसार, यो कार्यक्रम विद्यार्थीहरूको प्राविधिक क्षमता, नेतृत्व र सिर्जनशीलता प्रदर्शन गर्ने प्रभावकारी मञ्च हो ।
‘कनेक्ट, कम्प्युट, क्रियट’ भन्ने मूल नारासहित डिसेम्बर २१ देखि २६ सम्म सञ्चालन हुने ‘आइटी मिट २०२५’ मा १५ भन्दा बढी कार्यक्रमहरू समावेश गरिएका छन्। प्रि–इभेन्टका रूपमा ‘इम्पावर हर’, ‘वी सिल्ड साइबर’, ‘गेमिङ इभेन्ट्स’ र ‘आइडिया पिचिङ’ आयोजना गरिनेछ भने प्रदर्शनी तथा पोस्ट–इभेन्टका कार्यक्रमहरू पनि रहनेछन् ।
कार्यक्रमको मुख्य आकर्षण पौष ११ गते हुने मुख्य इभेन्ट हो । सो अवसरमा विद्यार्थीहरूले तयार पारेका हार्डवेयर तथा सफ्टवेयर परियोजनाहरूको प्रदर्शनी हुनेछ । साथै, करियर फेयरअन्तर्गत ११ भन्दा बढी कम्पनीहरूको स्टल रहनेछन्, जहाँ विद्यार्थीहरूले रोजगारीका अवसर, इन्टर्नसिप र नेटवर्किङका सम्भावनाहरू पाउनेछन् । यसैगरी ‘दि एआई वेभ ः इलुजन अर इनोभेसन’ शीर्षकमा प्यानल छलफल, ‘आइटी क्विज’ लगायत विभिन्न ज्ञानमूलक तथा प्रतिस्पर्धात्मक कार्यक्रमहरू आयोजना गरिने आयोजकले जनाएको छ ।
