पनौती, भदौ १४ ।
डा. विन्दा पाण्डे लिखित गैरआख्यान कृति भुइँमान्छे माथि आज पनौतीस्थित ताम्राकार पार्टी प्यालेसमा आयोजित परिसंवाद कार्यक्रम सम्पन्न भएको छ । कार्यक्रममा काभ्रेपलाञ्चोक जिल्लाका पुराना कम्युनिष्ट नेता तथा कार्यकर्ताको उल्लेख्य सहभागिता रह्यो।
कार्यक्रममा नेकपा (एमाले) सल्लाहकार परिषद्का सदस्य युवराज कार्की, नेपाल बौद्धिक परिषद्का के.स. विकास गौतम, अनेमसंघ काभ्रेका संस्थापक अध्यक्ष तथा प्रतिनिधि सभाका पूर्वसदस्य शिला कतिला, जिल्ला समन्वय समितिका निवर्तमान अध्यक्ष उद्धव के.सी., नेकपा (एमाले) जिल्ला कमिटी सदस्य नवराज भुर्तेल र पूर्वशिक्षक एवं इतिहासविद् तुयुकाजी ताम्राकारलगायत वक्ताहरूले काभ्रेपलाञ्चोकमा कम्युनिष्ट राजनीतिको शुरुवात, विकास र विस्तारबारे आफ्ना विचार राख्दै कृतिमा छुटेका केही घटना तथा पात्रहरूबारे लेखकको ध्यानाकर्षण गराए।
नेपाल बौद्धिक परिषद्, काभ्रेपलाञ्चोक जिल्ला समितिका अध्यक्ष केशव थापाले समालोचनात्मक टिप्पणी प्रस्तुत गर्दै भुइँमान्छे कम्युनिष्ट नेता तथा कार्यकर्ताका लागि पठनीय र सङ्ग्रहणीय कृति रहेको बताए। उनले जिल्लासम्बन्धी छुटेका प्रसङ्गलाई समेट्न लेखकलाई सहयोग गर्न आग्रह गर्दै, काभ्रेपलाञ्चोकले आफ्नो राजनीतिक इतिहास आफैं लेख्ने तत्परता देखाउनुपर्नेमा जोड दिए।
कृतिकार डा. विन्दा पाण्डेले पुस्तक लेखनका पछाडिका प्रसङ्ग खुलाउँदै, पार्टी निर्माणमा भुइँमा बसेर योगदान दिने नेताकार्यकर्तासँग प्रत्यक्ष साक्षात्कार गरेर कृति तयार गरिएको बताए। उनले यो पुस्तक अन्तिम नभई निरन्तर परिमार्जन र संशोधन हुँदै जाने “भुइँमान्छेको सम्पत्ति” भएकोले सही सूचना उपलब्ध गराएर सहयोग गर्न सबैसँग आग्रह गरे।
नेपाल बौद्धिक परिषद्, पनौती नगर कमिटीका अध्यक्ष शशीकुमार बोलखेको सभापतित्वमा सम्पन्न कार्यक्रममा परिषद्का नगर कमिटी सचिव विनोद गिरीले सञ्चालन गरेका थिए।
