चैत ४ गते बुधबार
भक्तपुर, सेकरिड हार्ट एकेडेमीको २३ औँ वार्षिकोत्सव, पुरस्कार वितरण तथा सांस्कृतिक कार्यक्रम-२०८२ भव्यताकासाथ सम्पन्न भयो ।
भक्तपुर नगरपालिका वडा नं. ४ गःपलीमा अवस्थित सेकरिड हार्ट एकेडेमीको २३ औँ वार्षिकोत्सव, पुरस्कार वितरण तथा सांस्कृतिक कार्यक्रम-२०८२ भक्तपुर नगरपालिकाका प्रमुख सुनिल प्रजापतिको प्रमुख आतिथ्यतामा सम्पन्न भएको हाे ।
कार्यक्रममा प्रमुख अतिथि प्रजापतिले मिहिनेत, अभ्यास र अवसरले मात्र विद्यार्थीहरूलाई सफलता हासिल हुने बताउँदै अवसर पाएको खण्डमा हरेक विद्यार्थीले उत्कृष्टता हासिल गर्नसक्ने धारणा व्यक्त गर्नुभयो । उहाँले विद्यार्थीको क्षमता अनुसारको शिक्षा प्रदान गर्नसक्नु नै शिक्षकको कर्तव्य हो भन्नुभयो । एसईई परीक्षा २०८१ मा ४ जीपीए ल्याउन सफल विद्यार्थी प्रिन्स लामा लगायतका सम्पूर्ण विद्यार्थीलाई बधाई एवम् शुभकामना दिँदै नगर प्रमुख प्रजापतिले बलियो शैक्षिक जग नै विद्यार्थीको सुनिश्चित भविष्य तय गर्ने आधार भएको बताउनुभयो ।
विद्यालयका प्रिन्सिपल श्रीराम सुवालले एसईई २०८१ मा ४ जीपीए ल्याउन सफल विद्यार्थी प्रिन्स लामाको मनोबल बढाउन र थप हौसला प्रदान गर्न विद्यालयले रु. ५० हजारको प्रोत्साहन रकम व्यवस्था गरेको बताउनुभयो ।
हाल सेकरिड हार्टमा ६०० को हाराहारीमा विद्यार्थीहरू अध्ययनरत रहेको उल्लेख गर्दै उहाँले विद्यार्थीलाई किताबी ज्ञानसँगै असल संस्कारको आवश्यकता औँल्याउनुभयो ।
नेसनल प्याव्सन भक्तपुरका अध्यक्ष संजय खड्काले विद्यालयले गरेको सफलतामा खुलेर प्रसंशा गर्नु भएको थियो । अध्यक्ष खड्काले क्षमतीवीन विद्यार्थी, मिहिनेती शिक्षकहरु, कुशल विद्यालय व्यवस्थापन र सहयोगि अभिभावकहरु भएकाले सेकरिड हार्ट एकेडेमी स्कुलले ४ जिपिए सहित उत्कृष्ट नतिजा ल्याउन सफल भएको बताउनु भयो ।
कार्यक्रममा भनपा वडा नं. ४ का वडाध्यक्ष उपेन्द्र सुवाल, उत्प्रेरक विकाश देव लामा, नेसनल प्याव्सन भक्तपुरका उपाध्यक्ष राम प्रसाद खाताखो लगाएतको उपस्थिति रहेको थियो ।
एसईई २०८१ का उत्कृष्ट विद्यार्थीलाई सम्मान, शिक्षक तथा कर्मचारी सम्मान, कक्षागत उत्कृष्ट विद्यार्थी सम्मान, विभिन्न विधामा अब्बल एवं विजेता विद्यार्थी सम्मान गरिएको वार्षिकोत्सब कार्यक्रममा विद्यार्थीहरुले विविध साँस्कृतिक प्रस्तुत गरिएको थियो ।
