लोक तथा दोहोरी गायक बेल बहादुर परियारको नयाँ दोहोरी गीत ‘फूल खसिगो, माया बसिगो’ को म्युजिक भिडियो मङ्गलबार बर्दिबासमा आयोजित विमोचन समारोहबीच सार्वजनिक गरिएको छ ।
राष्ट्रिय लोक तथा दोहोरी गीत प्रतिष्ठान नेपाल, महोत्तरीको आयोजनामा गौतम होटल, बर्दिबासमा सम्पन्न कार्यक्रममा मधेश प्रदेशकी पूर्व राज्य मन्त्री सारदा देवी थापा प्रमुख अतिथि तथा बर्दिबास नगरपालिकाका मेयर प्रह्लाद कुमार क्षेत्री विशिष्ट अतिथिका रूपमा सहभागी थिए । उनीहरूले संयुक्त रूपमा भिडियो विमोचन गरेका हुन् ।
गीतमा बेल बहादुर परियार र प्रतिमा अर्यालको स्वर, शब्द तथा संगीत परियारकै रहेको छ । एरेञ्ज, मिक्स तथा मास्टरिङ राजिव शाहले गरेका छन् । भिडियोमा सन्जिब ठकुरी र सुजाता भट्टराईको अभिनय रहेको छ भने निर्देशन मिलन श्रेष्ठले गरेका छन् । कोरियोग्राफी राजाराम सिंखडा र छायाङ्कन सन्तोष तिमल्सिनाको रहेको छ ।
कार्यक्रममा बोल्दै मेयर प्रह्लाद कुमार क्षेत्रीले स्थानीय कलाकारको संरक्षण र प्रवर्द्धन नगरपालिकाको प्राथमिकतामा रहेको बताए । उनले लोक संगीतको माध्यमबाट समाजमा सकारात्मक सन्देश प्रवाह हुने उल्लेख गरे ।
प्रमुख अतिथि सारदा देवी थापाले गायक परियारको सांगीतिक योगदानको प्रशंसा गर्दै संघर्षशील कलाकारलाई राज्य, समाज र मिडियाले साझा रूपमा प्रोत्साहन गर्नुपर्ने बताइन् ।
गीत विमोचन समारोहमा समाजसेवी, पत्रकार, राजनीतिक प्रतिनिधि, कलाकार तथा संगीतप्रेमीहरूको उल्लेख्य उपस्थिति रहेको थियो । कार्यक्रमको सञ्चालन बिनोद ढुङ्गेलले गरेका थिए ।
मिडिया पार्टनरका रूपमा ॐकार टेलिभिजनको लोकप्रिय कार्यक्रम ‘पञ्चामृत’ रहेको थियो ।
‘फूल खसिगो, माया बसिगो’ म्युजिक भिडियो गायक बेल बहादुर परियारको आधिकारिक युट्युब च्यानलमार्फत सार्वजनिक गरिएको छ ।
गीतको लिङ्क :
https://youtu.be/EXUnaiSIqC8?
