उनका अनुसार राजनीतिक दलहरू फागुन २१ मा तोकिएको प्रतिनिधिसभा निर्वाचनका लागि तयार र प्रतिबद्ध रहे पनि सरकारको अनिश्चयपूर्ण र दोधारे व्यवहारले देशभर शंका बढेको छ ।
फरार कैदी र लुटिएको हतियार मुख्य चुनौती
जेन–जी आन्दोलनपछिका घटना–उपद्रवका कारण फरार रहेका कैदीबन्दी र सुरक्षा निकायबाट लुटिएका हतियार निर्वाचन सुरक्षाका लागि गम्भीर चुनौती बन्ने थापाको तर्क छ ।
उनले भने, ‘भागेका कैदीबन्दी र हतियार सरकारले तत्काल नियन्त्रणमा ल्याउनुपर्छ । नभए तोकिएको मितिमा चुनाव सम्भव भए पनि वातावरण अनुकूल हुँदैन।’
थापाका अनुसार प्रधानमन्त्री सुशीला कार्कीलाई सर्वदलीय बैठकमै यी चुनौतीहरूबारे ध्यानाकर्षण गराइसकिएको छ ।
मधेशमा होली, पहाड–हिमालमा मौसम पनि समस्या
महामन्त्री थापाले मधेशमा होली पर्व पर्नु र पहाड–हिमाली क्षेत्रमा प्रतिकूल मौसम हुने सम्भावना पनि निर्वाचन व्यवस्थापनका दृष्टिले चुनौतीपूर्ण हुने बताए ।
उनका अनुसार, ‘तोकिएको मितिमा निर्वाचन गर्न केही कठिनाइ त छन् । तर राजनीति इच्छाशक्ति भए ती समाधानयोग्य छन्।’
सभापतिमा उम्मेदवारी दिने घोषणा
पत्रकार सम्मेलनमै थापाले आसन्न कांग्रेसको १५ औं महाधिवेशनमा सभापति पदमा उम्मेदवारी दिने घोषणा पनि गरेका छन् ।
उनका अनुसार पार्टीभित्र नयाँ नेतृत्वको अपेक्षा चुलिएको र कार्यकर्ताहरू परिवर्तन र ताजगी खोजिरहेकोले सभापतिमा आफ्नो उमेद्वारी रहने स्पष्ट गरे ।
