काठमाडौं,
मंसिर १४ ।
नेपाल उद्योग वाणिज्य महासंघको खेलकुद तथा मनोरञ्जन फोरमको संयोजनमा महासंघ र राष्ट्रिय कलाकारबीचको मैत्रीपूर्ण फुटसल प्रतियोगिता सम्पन्न भएको छ । बालुवाटारस्थित ढुकु फुटसलमा आयोजित खेलमा महासंघको टोलीले कलाकारको टोलीलाई चार गोलविरुद्ध सात गोल गरेको थियो ।
सो खेलको उद्घाटन महासंघका अध्यक्ष चन्द्रप्रसाद ढकालले गरेलगतै महासंघ कार्यसमिति पदाधिकारी र कलाकारबीच १० मिनेटको मैत्रीपूर्ण खेलपछि प्रतियोगिता सुरु भएको थियो । महासंघका अनुसार खेलको पहिलो सत्रमा महासंघले कलाकार टोलीलाई तीन-शून्य गोलअन्तरको दबाबमा राखे पनि दोस्रो सत्रमा कलाकारतर्फबाट तीन-तीनको बराबरीपछि खेल रोमाञ्चक बनेको थियो ।
महासंघको टोलीले थप चार र कलाकार टोलीले थप एक गोल गरेपछि एक घण्टाको सो मैत्रीपूर्ण खेल सात-चार अंकमा सकिएको थियो । खेल उद्घाटन गर्दै महासंघ अध्यक्ष ढकालले खेल केवल प्रतिस्पर्धाका लागिमात्र नभई आपसी मित्रता र सहकार्यको राम्रो अवसर भएको बताउनुभयो ।
खेलमा महासंघतर्फबाट अध्यक्ष ढकाल, उपाध्यक्षद्वय हेमराज ढकाल र ज्योत्सना श्रेष्ठ, कोषाध्यक्ष भरतराज आचार्य तथा कलाकार टोलीमा शिव श्रेष्ठ, धिरेन शाक्य, रविन्द्र खड्का, मोहन निरौलालगायतको सहभागिता थियो ।
उद्योगी व्यवसायी र कलाकारबीचको मित्रता तथा सद्भाव थप प्रभावकारी बनाउन मैत्रीपूर्ण प्रतियोगिता आयोजना गरिएको र नेपालका वरिष्ठ कलाकारको सहभागिताले खेल रोमाञ्चक तथा सफल भएको कार्यक्रम संयोजक महासंघका खेलकुद तथा मनोरञ्जन फोरमका अध्यक्ष हरिबहादुर कार्कीले बताउनुभएको छ । सहभागी खेलाडीलाई महासंघका अध्यक्ष ढकालले मायाको चिनो प्रदान गर्नुभएको थियो ।
