गाउँपालिकाका अध्यक्ष प्रेम बहादुर भुजेलको नेतृत्वमा गएको टोलीले पालिकाभित्र रहेका विभिन्न विद्यालयहरुको अनुगमन गरिएको हो । अनुगमनको क्रममा विद्यालयको शैक्षिक अवस्थामा सुधार ल्याउनको लागि विद्यार्थी, शिक्षक र अभिभावकको महत्वपूर्ण भूमिका रहेको र सबैले इमान्दारी भएर जिम्मेवारी पूरा गर्नुपर्ने अध्यक्ष भुजेलले बताउनुभएको छ ।अनुगमनको क्रममा विद्यालयको भौतिक पूर्वाधारको अवस्था कमजोर देखिएका विद्यालयहरुलाई पालिकाको तर्फबाट आर्थिक लगायतका पक्षमा सहयोग पुर्याउने अध्यक्ष भुजेलले प्रतिबद्धता जाहेर गरेका छन् ।

विद्यालयको शैक्षिक गुणस्तरलाई चुस्त दुरुस्त राख्नका लागि सम्मान, पुरस्कार र दण्डको व्यवस्थालाई तदारुकताका साथ कार्यान्वयन गर्नुपर्ने धारणा राख्नुहुँदै सामुदायिक विद्यालयहरुप्रति समाज र सम्बन्धित विद्यालयका शिक्षकहरुको व्यवहारमा परिवर्तन ल्याउनु चुनौतीपूर्ण रहेको समेत अध्यक्ष भुजेलले व्यक्त गरेका छन् । अनुगमनका क्रममा देखिएका बेथितिहरुको अन्त्यका लागि आवश्यक प्रक्रिया अगाडि बढाउन र विद्यालयको शैक्षिक वातावरणलाई स्वस्थ र गुणस्तरीय बनाउनका लागि विद्यालयको तर्फबाट सुझाव पेश गर्ने समेत अध्यक्ष भुजेलले आग्रह गरेका छन् ।

बिज्ञापन

भुम्लु गाउँपालिका शिक्षा इकाईले जानकारी गराएअनुसार ४३ वटा सामुदायिक विद्यालयहरु रहेका छन् । पालिकाले सामुदायिक विद्यालयप्रति विद्यार्थीहरुको आकर्षण बढाउन र गुणस्तरीय शिक्षा हासिल होस् भन्नाका खातिर शिशु कक्षादेखि १० सम्म अध्ययनरत बालबालिकाहरुका लागि दिवा खाजाको व्यवस्था गरेको पालिकाका अध्यक्ष भुजेलले जानकारी दिए ।

नेपाल सरकारले कक्षा ६ सम्म दैनिक प्रति विद्यार्थी बराबर १५ रुपैयाँको दरले दिवा खाजा व्यवस्था गरेको भएपनि पालिकाले त्यसमा १० रुपैयाँ थपेर कक्षा १० सम्मका विद्यार्थीहरुलाई २५ रुपैयाँका दरले खुवाउने आ.व. ०७८÷०७९ को बजेट मार्फत् विनियोजन गरिएको पालिकाका उपाध्यक्ष जितेन्द्र मान तामाङले जानकारी दिए ।

उक्त अनुगमनमा पालिकाका अध्यक्ष, उपाध्यक्ष, शिक्षा शाखाका फोकल पर्सन र स्थानीय बुद्धिजीविहरुको सहभागिता रहेको थियो