काभ्रे–२ बाट प्रतिनिधि सभाका उम्मेदवार अशोक कुमार ब्याञ्जु जनताको सेवा र राष्ट्रको समृद्धिलाई केन्द्रमा राख्दै चुनावी मैदानमा उत्रिनुभएको छ। नेकपा एमालेका तर्फबाट उम्मेदवारी दिनुभएका ब्याञ्जुले दीर्घकालीन विकास, सुशासन र जनउत्तरदायी राजनीतिक अभ्यासलाई आफ्नो प्रमुख एजेन्डा बनाउनु भएको छ।
लामो समयदेखि सामाजिक सेवा तथा विकास निर्माणका क्षेत्रमा सक्रिय रहँदै आउनुभएका ब्याञ्जुले जनताको विश्वास, सहभागिता र साथ बिनाको विकास सम्भव नहुने धारणा व्यक्त गर्नुभएको छ। काभ्रे–२ का विभिन्न स्थानमा आयोजित भेटघाट तथा अन्तरक्रिया कार्यक्रममा बोल्दै उहाँले शिक्षा, स्वास्थ्य, रोजगारी सिर्जना र पूर्वाधार विकासलाई प्राथमिकतामा राखेर काम गर्ने प्रतिबद्धता जनाउनुभयो।
“मैले जनताको समस्या नजिकबाट देखेको र बुझेको छु। अब ती समस्या समाधानका लागि नीतिगत र व्यवहारिक पहल गर्ने समय आएको छ,” उम्मेदवार ब्याञ्जुले भन्नुभयो।
उहाँले सुशासन, पारदर्शिता र जवाफदेहितालाई आफ्नो राजनीतिक यात्राको मेरुदण्डका रूपमा अघि सार्दै राजनीति पद, शक्ति वा स्वार्थका लागि नभई सेवाको माध्यम हुनुपर्ने स्पष्ट पार्नुभयो। “जनताको विश्वास मेरो सबैभन्दा ठूलो पूँजी हो, यसमा कहिल्यै आँच आउन दिने छैन,” उहाँको भनाइ थियो।
आगामी निर्वाचनमार्फत काभ्रे–२ को समग्र विकासमा नयाँ गति दिने र देशको समृद्धिमा ठोस योगदान पुर्याउने लक्ष्यसहित उम्मेदवार अशोक कुमार ब्याञ्जु घरदैलो अभियानमार्फत जनतामाझ आफ्ना योजना र प्रतिबद्धता प्रस्तुत गरिरहनुभएको छ।
