ललितपुर | राजन थापा
लायन्स क्लब अफ टेम्ल गणेशको संयोजन तथा मेघा अस्पताल र ॐ समाज डेण्टल अस्पतालको सहकार्यमा ललितपुरको चापागाउँ दोबाटोमा निःशुल्क स्वास्थ्य शिविर सम्पन्न गरिएको छ। स्थानीय बासिन्दालाई घरमै नजिकै स्वास्थ्य सेवा पुर्याउने उद्देश्यसहित आयोजित शिविरमा ठूलो संख्यामा सर्वसाधारणको सहभागिता रहेको आयोजकले जनाएको छ।
शिविरमा दन्त–स्वास्थ्य सेवा, सामान्य स्वास्थ्य परीक्षण, रक्तचाप, मधुमेह (सुगर) जाँचसहित विभिन्न रोगहरूको प्रारम्भिक परीक्षण र विशेषज्ञ चिकित्सकद्वारा परामर्श प्रदान गरिएको थियो।
ॐ समाज डेण्टलका शिविर व्यवस्थापक धन घिमिरेका अनुसार, आजको शिविरमा १०२ जनाको मधुमेह परीक्षण गरिएको थियो भने ३०३ जनाले दन्त–स्वास्थ्य सेवा प्राप्त गरेका थिए।
“सेवा लेनेमध्ये ५२ जनाभन्दा बढीको दाँत सफा (स्केलिङ) गरिएको छ,” उनले बताए।
त्यसैगरी, मेघा अस्पतालका डा. सुवास घिमिरेले नियमित स्वास्थ्य परीक्षण र समयमै सचेतना रोगबाट बच्ने सबैभन्दा प्रभावकारी उपाय भएको उल्लेख गर्दै भने,
“यदि रोग लागिहाल्यो भने पनि आर्थिक अभावका कारण कसैलाई उपचारबाट वञ्चित हुन नपरोस् भन्ने भावना लिएर हामीले यो शिविर सञ्चालन गरेका हौं।” लायन्स क्लब टेम्ल गणेशकी अध्यक्ष तूषणा थापाले ॐ समाज डेण्टलसँगको सहकार्यले समुदायमै गुणस्तरीय स्वास्थ्य सेवा पु-याउन महत्वपूर्ण सहयोग पुगेको बताइन्।
उनका अनुसार, “हामीले ॐ समाज डेण्टल अस्पतालसँग पाएको छुट र निरन्तर सहकार्य प्रशंसनीय छ। गभर्नर लायन पार्वती खरेल पाण्डेजीको ‘सेवानै धर्म हो’ भन्ने मूल मन्त्रले नै हामीलाई निरन्तर सेवा कार्यमा अघि बढाएको हो।”
कार्यक्रममा ॐ समाज डेण्टल अस्पताल र मेघा अस्पताल दुवैले प्रत्येक महिनाको दोस्रो शनिबार निःशुल्क स्वास्थ्य शिविर नियमित रूपमा सञ्चालन गर्ने प्रतिबद्धता व्यक्त गरेका छन्।
यस सम्बन्धमा अस्पतालका प्रमुख किशोर जंग राणा र सामाजिक अभियन्ता पत्रकार राजन थापाबीच सहकार्यसम्बन्धी समझदारीपत्र (MOU) मा हस्ताक्षर गरिएको छ।
ॐ समाज डेण्टल अस्पताल आधुनिक दन्त–स्वास्थ्य सेवा प्रदायक संस्था हो। विशेषज्ञ दन्त चिकित्सक, अत्याधुनिक उपकरण तथा किफायती सेवाका कारण ॐ समाज डेण्टल अस्पताल समुदाय–मुखी दन्त शिविर, स्केलिङ, फिलिङ, एक्स–रे, रुट क्यानल, ब्रेसेसलगायत सम्पूर्ण ओरल–केयर सेवा उपलब्ध गराउँदै विभिन्न स्थानमा शाखा विस्तार गरिरहेको छ।
ललितपुरमा सञ्चालनमा रहेको यो बहु–विशेषज्ञता (Multi-specialty) स्वास्थ्य संस्था हो। सामान्य स्वास्थ्य परीक्षण, विशेषज्ञ सेवा, आकस्मिक उपचार, प्रयोगशाला सेवा तथा समुदाय–मुखी स्वास्थ्य कार्यक्रम सञ्चालनमा सक्रिय मेघा अस्पताल स्थानीय बासिन्दालाई सुलभ, सुरक्षित र गुणस्तरीय स्वास्थ्य सेवा दिन प्रतिबद्ध छ।
