काठमाडौं, राजन थापा जेष्ठ २८ “जसको दाँत सबल, उसको जीवन सफल” भन्ने सन्देशका साथ, लायन्स क्लब अफ काठमाडौं इन्द्रा अन्नपूर्णको सह–आयोजना र ॐ समाज डेन्टल अस्पतालको प्राविधिक सहयोगमा निहारिका शिशु कुञ्ज सेकन्डरी स्कुल, बालाजुमा एक दिवसीय निःशुल्क दन्त स्वास्थ्य शिविर सम्पन्न गरियो।
शिविरमा ४ वर्षका बालकदेखि ८६ वर्षीया आमासम्मले सहभागिता जनाई स्वास्थ्य परीक्षण गराए। ॐ समाज डेन्टल अस्पताल बनस्थली शाखाकी प्रमुख सबिना पापन गुरुङका अनुसार, “विविध उमेर समूहका सेवाग्राहीहरू खुशी हुँदै दन्त परीक्षणमा सहभागी हुनुहुँदा, हाम्रो सेवाले साँचो अर्थमा समुदायलाई छोएको अनुभूति भयो।”
शिविरमा विद्यालयका विद्यार्थी, शिक्षक–शिक्षिका, अभिभावक लगायत समुदायका अन्य सदस्यहरूले पनि सेवा प्राप्त गरे। दन्त परीक्षणका साथै, आवश्यक अनुसार दाँत सफा गर्ने, दाँत निकाल्ने, र स्वास्थ्य परामर्श प्रदान गर्ने कार्य गरियो।
कार्यक्रमका क्रममा “स्वस्थ जीवनको पहिलो पाइला मुख–दन्त सफाइबाट सुरु हुन्छ” भन्ने सन्देश दिइयो। साथै सहभागीहरूलाई “९०% रोग मुखको उचित हेरचाहबाटै रोक्न सकिन्छ” भन्ने महत्वपूर्ण जानकारीसमेत प्रदान गरिएको थियो।
शिविरले बालबालिकाको मुस्कानमा आत्मविश्वास थप्ने, अभिभावकको चिन्ता कम गर्ने, र शिक्षकहरूलाई स्वास्थ्यप्रति सजग बनाउने अवसर प्रदान गर्यो। कार्यक्रम पश्चात अस्पताल र विद्यालयबीच दीर्घकालीन सहकार्यको सम्भावना समेत खोलिएको जानकारी आयोजकहरूले दिएका छन्।
यो शिविर केवल उपचारको अवसर मात्र थिएन—यो स्वास्थ्य, माया र सामाजिक जिम्मेवारीप्रतिको समर्पणको प्रतीक थियो।
