बाराको प्रसौनी गाउँपालिका–६ स्थित किरण वेभरेज प्रालि पानी उद्योगमा कार्यरत प्रबन्धक रामकिशोर सिंहको हत्यामा संलग्न दुईजना अभियुक्त १८ घण्टामै पक्राउ परेका छन। जिल्ला प्रहरी कार्यालय बाराबाट खटिएको विशेष टोलीले ती दुई जनालाई फरार अवस्थामा खोजी गरी नियन्त्रणमा लिएको हो।
घटनाको खबर पाएलगत्तै प्रहरी टोलीले मुचुल्का उठाई हत्या भएको ठाउँ वरिपरि खोजतलास तीव्र पारेको थियो। सोही क्रममा प्राप्त सूचनाको आधारमा प्रहरीलाई अभियुक्तसम्म पुग्न मद्दत भएको र छोटो समयमा पक्राउ गर्न सफल भएका बारा प्रहरीले जनाएको छ। प्रहरीले घटनाको कारण तथा अन्य संलग्नताबारे विस्तृत अनुसन्धान अघि बढाइरहेको छ।
प्रहरीले पक्राउ परेकालाई प्रारम्भिक अनुसन्धानका लागि जिल्ला प्रहरी कार्यालय बारामै राखिएको जनाएको छ। पक्राउ परेका व्यक्तिहरूको पहिचान भने अनुसन्धान जारी रहेकाले प्रहरीले खुलाएको छैन। ‘आवश्यक कानुनी प्रक्रिया पूरा भएपछि घटनाबारे विस्तृत विवरण सार्वजनिक गरिने बारा प्रहरीले बताएको छ।
