काठमाडौं । नेकपा (एमाले) ले आसन्न ११ औँ राष्ट्रिय महाधिवेशनका लागि तयार गरिएको आधिकारिक लोगो सार्वजनिक गरेको छ। लोगोमा प्रयोग गरिएका प्रतीक र रङहरूले पार्टीको इतिहास, राष्ट्रिय पहिचान र समकालीन भावना समेटेको एमालेले जनाएको छ।
महाधिवेशनको लोगोमा ‘११’ अंकसँगै धरहरा विशेष रूपमा उभिएको छ। धरहरालाई नेपाली जनताको सामूहिक उचाइ, सहनशीलता र दृढ मनोबलको प्रतीकका रूपमा प्रस्तुत गरिएको छ। भक्तपुरको सांस्कृतिक आत्मा झल्काउने न्यातापोल तथा उपत्यकाको परम्परागत रञ्जना लिपिले देशको समृद्ध सांस्कृतिक वैभवलाई सम्मान गरिएको एमालेले बताएको छ।
लोगोमा रहेका निलो र सिम्रिक रङहरू राष्ट्रिय ध्वजाको गौरवलाई प्रतिध्वनित गर्दै एकता र अभिमानको सन्देश दिनेतर्फ लक्षित छन्। सबै प्रतीकहरूको केन्द्रमा स्थान पाएको हसिया–हतौडासहितको सूर्य एमालेको स्थायी चिनारीका रूपमा उठाइएको छ।
पार्टीका अनुसार महाधिवेशनको लोगोले ‘उन्नति, समृद्धि र खुशी’ तर्फ अघि बढ्ने एमालेको विचार, दृष्टि र प्रतिबद्धता अभिव्यक्त गर्छ।
