सेलिब्रेटी नेपालको आयोजनामा दोस्रो ‘नेपाल ग्रामीण चलचित्र महोत्सव’ काभ्रेपलान्चोकको भकुन्डेबेशीमा हुने भएको छ ।
सोमबार काभ्रेको बनेपामा पत्रकार सम्मेलनको आयोजना गर्दै आगामी जेठ २५ गतेदेखि २७ गतेसम्म महोत्सव हुन लागेको जानकारी गराइएको छ ।
महोत्सवमा २६ वटा फिल्महरु सहभागी हुने आयोजक संस्था सेलिब्रेटी नेपालका अध्यक्ष रघुनाथ सापकोटाले बताए । नेपाली मौलिक कथा बोकेका चलचित्रहरू महोत्सवमा देखाइने सापकोटाले जानकारी दिए ।
महोत्सवमा गाउँले परिवेशमा बनेका स्वदेशी फिचर तथा लघु फिल्म, डकुमेन्ट्री तथा भाषाभाषीका फिल्महरु स्क्रिनिङ हुनेछन् ।
महोत्सवमा स्क्रिनिङ हुने फिल्महरुमध्ये उत्कृष्टलाई अवार्ड समेत प्रदान गरिने सापकोटाले जानकारी दिए । स्थानीय क्षेत्रको भाषा, कला, संस्कृति एवं पर्यटकीय क्षेत्रको प्रवर्धन गर्नु र नेपाली चलचित्र हेर्ने बानी बसाल्नु महोत्सवको मुख्य उद्देश्य हो ।
दर्शकलाई नेपाली मौलिक फिल्मप्रति आकर्षित गराउनु, नियमित नेपाली फिल्म हेर्ने बानी बसाल्नु, स्थानीय भाषा, कला, संस्कृति एवं पर्यटकीय क्षेत्रको प्रवर्द्धन गर्नु महोत्सवको मुख्य उद्देश्य रहेको सेलिब्रेटि नेपालका अध्यक्ष सापकोटाले जानकारी दिनुभयो ।
चलचित्र महोत्सव सम्पन्न गर्न १५ लाख अनुमान आयोजकको छ । महोत्सव सञ्चालनका निम्ति चलचित्र विकास बोर्डले सहकार्य गरेको छ ।
महोत्सव अघिल्लो वर्ष बैशाखमा गोरखाको लाप्राकमा सम्पन्न भएको थियो । 
